Vertuosa sulamitella
U sposu:
O Cara Sulamitella
Sì bella in tremulella
U me melu, u me peru
U m'affettu hè in veru
E to belle labbre vogliu
Rivoccami u to oliu
Aiutami à cumbatte
Fammi tastà u to latte
Pè piacè, veni vicinu
Imbriacami di vinu
Silenziosa m'ai vintu
Aghju brama d'esse strintu
Cum'è un mufrone saltu
Cullemu sempre in Altu
Veni, sorti di a stretta
Currimu a me mufretta
Più luntanu chè l'intornu
Currimu, hè sempre ghjornu
Andemu in piattatoghju
Accetta u me alloghju
A sposa:
O Tesoru Tant'Amatu
U me core t'aghju datu
Stattine à u me latu
U bughjone s'avvicina
Sentu l'Orca chì macina
Sò piatta ind'u machjone
T'aspettu u me mufrone
Carissimu benedettu
Amore cusì dilettu
Fà compie u me castigu
Sfidati di u Nemicu
U sposu:
O tocca da u Signore
Perdona u me Errore
Vogliu esce di u Bughju
Precu à Ghjevvah è mughju
Fidata è Vertuosa
O corsa, Cristiana Sposa
Senza mai più disturbatti
U sustegnu vogliu datti
A sposa:
Cursarellu isulanu
Ariu d'u nostru veranu
Ligore di u melgranu
Sì bellu o cirneanu
Odor' di gigliu è fenu
Tù mi faci vene menu
Statti quì è nò luntanu
Carezza bè a me manu
O chjarasgiu prufumatu
Meriti d'esse amatu
Mi riporti in ghjuventù
Corsu, u più bellu sì tù
Chì rispiru deliziosu
Dormi tantu caru sposu
U sposu:
Diletta di e mo vene
U sonnu ùn vole vene
Riposa a me lumera
Mi sò messu in prichera
U sposu preche:
Diu purificheghjami
Cù spiritu santu veghjami
L'Illegale Desideriu
Mi rendia prighjuneru
JMB