1-Oghje ghjormu, sò tant'è più l'umani à ribatte i chjodi. Ogni sorte di male da elli hè praticatu. Parechji tombenu u prossimu. Ghjevvah è Ghjesù ùn volenu ch'è no siamu assassini.

 

Esodiu 20 :13 : Un'devi assassinà.
1 San Ghjuvanni 3 :11,12 : Perchè questu hè u messaghju ch'è v'ete intesu da u principiu : ch'è no ci tengamu cari l'unu cù l'altru, micca cum'è Cainu, figliolu di u Diaule , chì tumbò u fratellu. E'perchì mutivu u tumbò ? Perchè chì e so opere eranu criminale, è quelle di u fratellu ghjuste.

 

2-Certe ghjente arrubenu. Diu ùn vole ch'è no siamu ladri.

Esodiu 20:15: Un' devi arrubà.
Effesini 4 :28 : Chì u ladru ùn arrubi più, ma, affinch'ellu aghja qualcosa à dà à l'indigente, deve dassi capu onestamente.

 

 

3- Cert'omi piglienu moglie è po moglie. Parechji campenu cù duie o più donne quindi è cullandi. Altri u matrimoniu u ti calcicheghjenu in più manere. A' Diu ùn piacenu st'andamenti.
1 Corinti 7 : 1-4 : In risposta à a dumanda ch'è vo m'ete fattu in à vostra lettera, dicu à voi : sarebbe bè per l'omu di ùn tuccà donna, ma per francassi da a Furnicazione, chì ogni omu aghja a so propria moglia, è ogni donna u so propriu maritu. Chì u maritu cuncedi à a moglia devuta binevulenza, è parimente a moglia à a u maritu. A moglia ùn hà pudestà nant'à u so bisognu intimu [legale], ma hè u maritu: parimente u maritu ùn hà pudestà nant'à u so bisognu intimu [legale], ma hé a moglia.

 

1 Timuteiu 3 :1-2 : Sta dichjarazione hè esatta. S'è un omu vole esse Anzianu in a Cungreca brame una bellissima cosa, ma l'anzianu deve esse un omu chì ùn si pò tuccà, nemicu di u disordine, ospitalieru è capace di dà l'Insegnamentu.

 

 

4 Diu ùn hà datu chè una sola moglia à Adamu. Simu d'accordu ?

 

Ghjenesi 2 :22,24 : E'Ghjevvah Diu, cù a costa ch'ellu avia tiratu da l'omu, furmava una donna è a purtava à l'omu.(...) Perciò l'omu babbu è mamma lascerà pè unissi cù a so moglia, è tramindui li tuccherà à andà cum'è una sola persona.

 

 

5 Cert'omi danu l'adurazione a l'Iduli. Da Ghjevvah Diu sti sviati glurificatori ùn sò agraditi.

Esodiu 20 :4,5 : Un'devi fà idulu sculpitu nè forma simile à alcuna cosa chì hè in i Celi, quassù, o nant'à a Tarra, o indù l'acqua o sottu à a tarra. Un' vogliu ch'è tù fia per elli nè inghjinuchjamenti, nè offerte, perchè Eiu, Ghjevvah, u to Diu, sò un Diu chì vole esclusiva divuzione. Cuncernendu quelli chì mi odienu culpiscu e mancanze di i babbi nant'à i figlioli sin'à a terza è quarta generazione.

Isaïa 44 :9-17 : quelli chì facenu iduli sculpiti sò tutti una chimera è i so capilavori ùn ghjovenu a nunda. I so Testimoni sò cechi è sordi . Di vergogna ch'elli sianu cuparti.

Quellu chì sì hè messu à fà un diu o una simplice fiura in metallu sguaghjatu ùn hà avutu nisun suddesfu. Eccu tutti i so glurificatori saranu cunfusi, è l'operai ùn sò chè omi.

Elli tutti inseme si aduneranu. Pigliati da u terrore tremeranu. A vergogna s'attaccherà à u so essere.

In quant'à u stazzunaru chì travaglie u farru nantu à carboni rossi, senza avè a brama di rifiatassi, ghjuvendusi di lima è di martellu per dalli un bell'aspettu ; à un certu mumentu, famitu è assitatu finisce per stancassi.

U scultore, ellu travaglie u legnu. Hà stesu a corda per misurà. Cù a calce rossa face un dissegnu ; cù a raschia l'eseguisce. Pocu à pocu cuntinueghje à rende a fiura simile à a belleza di l'umani per stà in una casa.

[ Chì disgrazia ! ] Un cert'omu s' affaccende per taglià i cedri ; è ellu sceglie unu di st'arburi di a furesta, iè, un arburu massicciu, è u lasce diventà forte per ellu. Inoltre, hà piantatu un lauru è l'acqua turrenziale l'hà fattu ingrandà. Dopu esse statu tagliatu certi pezzi di stu lauru anderanu in u fucone per scaldà a ghjente è l'altri pezzi [in u fornu] per coce u pane. Ma di u sopra à più di stu legnu ne face una fiura , iè, un diu, è à questu cù inghjinuchjamenti li dà l'adurazione. Iè, ne brusge a metà in u focu è sopra arrustisce a carne ch'ellu manghje. Quand'ellu hè saziu dice : « Aha ! Mi sò scaldatu. Aghju vistu a luce di u focu. » Ma cù l'altra metà di a legna ne face una fiura, un diu, è cù inghjinuchjamenti li dà l'adurazione. Prichendu dice : « Salvami, perchè sì u me Diu. »

 

 

 

6 A' quelli arughjunati à u male, in sviati andamenti, persi per l'idulatria, a mattana li sarà data da Ghjevvah Diu, u Putente Rè di l'Armate celeste.

 

San Lucca 13 :5 : Nò, vi dicu, ma s'è pentimentu ùn avete, ancu voi cunsumati sarete tutti.

 

1 Corint 6 :9-10 : Un'sapete voi chì l'inghjusti ùn erederanu u Regnu di Diu ? Un' siate sviati . Nè furnicatori, nè idulatri, nè adulteri, nè omi intrattenuti per cusacce antinatura, nè omi chì sì mettenu inseme,nè ladri, nè avidi, nè briaconi, nè inghjuliatori, nè scrucconi, ùn erederanu u Regnu di Diu.

 

 

Amati i fidati lettori cirneani

 

Ancu in stu mondu à cataru in collu si pò truvà a felicità per via di l'esatta cunniscenza di ciò ch'è a Bibbula dice riguardu à Diu, à u so Regnu è à u so maravigliosu prughjettu per l'umanità. S'è vo circate à sapenne di più o vulete chì qualchissia tenga cù voi un Studiu Biblicu (à gratisi) à dumiciliu, scrivitemi.

 

U smeritatu Favore di Ghjevvah Diu i di Cristu Ghjesù, u nostru Redentore, sia da fondu à cima è da cima à fondu cù voi.
Sinceramente vi abbracciu

 

J M B