Cara ghjente di u Signore,

A′ tempi andati, prima di u diluviu, a ghjente cuntinuò à manghjà, à beie è à maritassi finu à u ghjornu in u quale Noè entrò indù l′ arca. Nisunu si rese contu di nulla, ma u diluviu ghjunse è i si pigliò tutti. Pudete leghje ste parolle in u Vangelu secondu San Matteiu, capitu 24 – versetti 38 è 39.

  

Diu, un mondu gattivu u spanticheghje

1 – I discendenti d′ Adamu si multiplichedenu ancu elli pigliedenu a gattiva strada. Diu hà dunque decisu di falli smarisce.

  

Ghjenesi 6 : 1 – 7 : Orbè ghjunse què : quandu chì l′ omi cumincedenu à bulighjà nant′ à a Tarra è ch'elli ebbenu figlioli è figliole, i Figlioli di Diu [cert′ anghjuli ribelli] videnu chì e giuvanotte eranu bellissime. Pigliendu forma umana si missenu cù tutte quelle ch′elli avianu sceltu. Dopu à ste cose Diu disse : “A me pacienza per l′ omu ùn sarà eterna, perchè piu di  carne è d'osse ùn hè. A so vita averà un limita : centuvint′ anni. I Nefilim [Giganti] eranu nant′ à a Tarra, è ancu dopu, quandu chì i Figlioli di Diu cuntinuavanu à cunnosce e figliole di l′ omi. Elle li dedenu masci assai . Questi ebbenu abbriu in l′ antichità. Eranu umatali spaurati. Di cunsequenza Ghjevvah vide chì a gattivera di l′ omu era arcifalata. Tutte e so pensate eranu criminale. Ghjevvah si pentì d′ avè creatu l′ omu nant′à a Tarra. Ellu ne fù ben afflittu. Ghjevvah disse dunque : “Faraghju smarisce da a Tarra st′ omu da mè creatu, è inseme cun′ ellu ancu u bestiame è l'acillame. Quantu mi ne pentu d′ avelli creati!”

  

 

2 – Ma in quelli tempi campava un brav′ omu di nome Noè.

 

Ghjenesi 6 : 8, 9 : Ma Noè ebbe u Favore di Diu. In a so storia leghjimu què : Noè fù un omu ghjustu frà i so cuntempuranei. Sempre viaghjava cù Ghjevvah Diu.

  

  

3 – Ghjevvah li disse di fà una barca di quelle affinch′ ellu fussi salvatu cù a so famiglia in u ghjornu di a distruzzione di i Pessimi Scellarati. A barca a forma l'avia d'un casgione. Fù chjamata arca. 

  

Ghjenesi 6 : 13, 14 : Dopu à ste cose Diu disse à Noè : L′ ora hè ghjunta ! Vogliu fà smarisce u vivu d'ogni spezia, cagione di e gattive opere di l'omu; empienu elle a Tarra di viulenza. E′ eccu i ruvineghju tutti inseme cù a Tarra. Fatti un Arca di legnu d′ alberu rasginosu. Indù st′ Arca farei cumpartimenti è a cuprerai dentru è fora di catramu.”

  

  

4 – Noè è a so famiglia fecenu entre indù l′arca animali tanti è più.

  

Ghjenesi 6 : 19 – 21  : E′ di tutta creatura d′ ogni sorte, ne farei entre indù l′ arca, duie di ciascuna per cunservalle in vita cù tè. Saranu masciu è femmina. Di l'acillame secondu a so spezia è di tutti l′ animali chì si movenu nantu à u terrenu secondu a so spezia, veneranu cù tè, duie di ciascuna per avè salva a vita. Procurati ogni genere di viveri è prepara una scorta : servirà di cibu per tè è per elli.

  

  

5 – Ghjevvah fece falà nantu à a Tarra un'acquera furibonda. A'tutti i gattivi sughjetti li tuccò a morte. Quelli chì eranu in l′ arca funu tutti messi a salvamentu.

  

Ghjenesi 71 : 11, 12, 21 : In u seicentesimu anu di a vita di Noè, u secondu mese, u dicesettesimu ghjornu di u mese, in quellu ghjornu tutte e surgente di l′ ampie acque di l′ abissu s′ apredenu. E′ nantu à a Tarra piosse à dirotta per quaranta ghjorni è quaranta notte. (…). Spirò dunque ogni carne è osse chì si muvia nantu à u terrenu, frà l'acillame è frà e bestie salvatiche è frà l′ animali mansi è frà tutti i brullichimi chì furmiculavanu nant′ à a Tarra, è tuttu u generu umanu. 

  

PS : Care ghjente di u Signore, U ghjornu di u Gran Ghjudiziu hè vicinu. Ghjevvah Diu darà dinù a mattana a i Pessimi Scellerati, figlioli di u Diaule. S′ è cum′ è Noè è a so famiglia vulemu esse salvati, devimu leghje, studià è mette in pratica a Sacra Parolla di u nostru caru Babbu Celestu. In a prima Lettera di San Petru, Capitulu 3 – versetti 10 à 12, leghjimu sti santi cunsigli : “Quellu chì vole amà a vita e vede boni ghjorni ch'ellu trattenga a so lingua di u male è e [so] labre di u parlà ingannatore; alluntanendusi di u male ch'ellu cerchi a pace cù tenecia ; perchè l′ ochji di Ghjevvah fideghjenu i ghjusti. Per stà à sente e so prichere ellu tende l′ arechja. Ma Ghjevvah à quelli chì facenu u male un li pò pate.”

Cù voi sianu Pace, Amore, Fede, Pacienza è Speranza. A′ prestu, s′ è Diu vole.

Per megliu capisce a me prossima Lettera leghjite, per piacè :

San Matteiu capitulu 24 – San Marcu 13 – San Lucca 21 –

Lettera di San Paulu à Timuteiu 3 : 1 à 5. Vi ringraziu.

Jmb