Ochjatana, caru paese corsu - 1975

 

Dopu tant' anni fora, ritornu in Ochjatana
Mì campu indù a me casa, casa à sulana
Ma in u chjassu si hè siccata a me funtana
Per colpa di u mudernu e ghjente sò cambiate
Addiu e serenate, luntanu e vighjate
Senza ruminicà nè capu, nè pede, nè bracciu
A maior'parte santificheghjenu u pustacciu
D'estate, in piazza cumuna, fendu sfrancisate
Parechji, à u prossimu, lampenu stuzzicate
O Signore, per piacè, arrizzate ste barate
Fate ch'ellu rifiurisca u core d'Ochjatana
Chì l'omi fianu fiscà sigone è furlana
Chì e donne inseme carmineghjinu a lana
E' asppettendu u vostru Santu è Bellu Mondu
Lampate e nemicizie ind'u gran Sprufondu

 

JMB

 

 

Ochjatana - 1984

 

O Ochjatana, caru paese corsu
D'amore per tè u me core hè grossu
A m'imperfetta rima à ti vogliu dà
Per piacè in grembiu à tè lasciami campà
Qui mi sentu 
riccu più chè un grande Rè
Ripigliendu forza cantaraghju per tè
Ochjatana ti cantaraghju, ti cantaraghju
I me muri falati l'arrizzaraghju
Sott' à l'ochji di i me divini Amichi (1)
Puneraghju pitricaghju di l'antichi

 

Ralegratevi benedetti rughjoni
Manghjaremu torna dolci bon' bucconi
Ochjatanella, cara Ochjatanella
Precu chì per tè luci divina Stella
Chì Cristu ti rendi locu di cultura
Di fole ùn' avemu nisun' premura
Ochjatanella, cara ochjatanella
Alluntanati di a pulitichella
Incù a Legge di u Celestu Seme (2)
Gratisi, rispirendu sanu ventu
Sfranchemuci di gattivu pensamentu

 

 

 

Un suppulellu ti sì addurmentata

Ma da u celu ùn sì abbandunata

Alegria per tè cara Ocjhatana

Mentre ch’ella canta donna furlana

Avà femu corre a nostra funtana

O ghente, carminate a vostra lana

 

Un suppulellu ti addurmintata

ma da u Celu ùn abbandunata

Fratelli è surelle di stu paese

Tenite e nostre lumere accese

Incù i più belli strumenti musicali

O corsi, cantemu i nostri lucali

Per ottene oliu è schietta farina

Curemu a muntagna è a marina

Cara Ochjatana, alza a lumera

Di schiettu amore porta a bandera

 

 

Cara Ochjatana

Antica Aghjatana

Teni in tupezzu sale

Sfrancati di u male

Bellu paese meiu

Cura u calateiu

Amendu à  Belgodè

Cultiveghja u sindé

 

Nò, ùn ti lascià corre

Pè Diu aghja amore

Un’ ciumbà in a fanga

Piglia zappa è vanga

In stu mondu d’accese

Sconta tutte l'offese

Per u discirnimentu

Dumanda santu ventu

Spiritu di u Creatore

E’ di u Redentore

Un porte mai errore

 

Nò, ùn ti fà disturbà

Da i senza carità

Per avé bell’ anellu

Difendi l’orfanellu

Cù spiritu è cù pettu

Cultiveghja l’affettu

Gattivu ùn invidià

Mai ùn lu poi ammansà

A’ u pessimu stortu

Un’ li dà u to ortu

Cù stimulu d’antichi

Vai cù veri Amichi

 

JMB

 

 

 

Note:

(1) divini Amichi: Dieu et son Messie

(2) Seme: Fils de Noé; Certains éxégètes bibbliques pensent, que peut-être, sous le nom de Melchisedec, Sem était Roi de Salem. Si celà est exact, il préfigure alors le Christ.